長毛「自稱黑社會」被報警 揶揄愛港力 愛港之聲舉報

8sun

【明報專訊】真普選聯盟噚日舉行首場研討會，最終因為被「守護中環」人物踩場而被迫腰斬。面對一班踩場者，多名真普聯成員除咗叫佢哋靜一靜外，都冇佢哋符，唯獨向來火爆嘅

社民連「長毛」梁國雄同佢哋正面駁火，仲揶揄佢哋係「黑社會」。

                               
登錄/註冊後可看大圖

諷愛港力有曾偉雄照住

話說喺真普聯召集人鄭宇碩宣布暫停會議後，長毛突然入場喺房間一角高呼﹕「我係黑社會愛港力！鄭宇碩你再唔收聲我就打你！你同黑社會作對小心啲呀！愛港力好犀利，連（警務處長）曾偉雄見到都要叩頭，有佢照住就唔使坐監！」呢個時候有踩場者即時話「係呀，無錯！」、「長毛萬歲！」，亦有人叫佢收聲。長毛仲愈講愈激動，批評愛港力「叫埋啲道友」嚟踩場。

若果大家以為雙方嘅爭拗喺會議腰斬後會同時完結就錯喇。事關愛港之聲主席高達斌喺會後去咗警署報案，舉報長毛「自稱黑社會」，「我哋錄晒音，聽到佢講『我係黑社會』後先講『我係黑社會愛港力』，佢講埋『愛港力』都係想兜啫！」

高達斌錄埋音 長毛：歡迎報多幾次

長毛就回應話，歡迎愛港之聲去報多幾次警，仲叫佢哋搵反黑組拉佢。佢強調佢喺研討會上咁講，係想揶揄愛港力好似黑社會咁黑箱作業，又話愛港力係有權嚟示威，但係不斷喺度嘈就唔得，因為呢個研討會並唔係公開場合，仲話自己喺立法會叫囂，都要畀立法會主席曾鈺成叫收聲及出去喎。警方就話收到兩男子到深水埗警署報案，指一名男子懷疑高聲呼叫自稱是三合會， 警方已從報案人檢走錄影片段調查，繼續跟進，案件暫列「自稱三合會成員」處理，未有人被捕。