平等機會婦女聯席晚上在遮打花園舉行「反送中#MeToo」集會,追究警察性暴力並捍衞香港人尊嚴,現場所見有近2000人參與。集會人士陳小姐認為,警察在拘捕時做了很多不恰當的行為,「尤其見到係女仔時,點解唔跟返嚴謹嘅法律去進行呢?」直言並不容許近日警察性凌辱女性示威者的情況,又對於警方的所作所為感到「想作嘔」,「喺香港咁現代嘅社會,點解會有啲咁嘅事發生?佢哋覺得自己大晒,以維持治安為名,其實係無法無天」。陳小姐指,即使處理女性示威者的人為女警,也可構成性侵,「你唔知道佢嘅性取向,我覺得你侵犯係唔舒服,就已經係唔恰當」。
Suki手持印有「執法為名,凌辱為實」的紙牌出席集會,她直言「睇唔過眼」而出席今晚集會,「睇唔過眼警察啲性暴力同埋警暴」。對於警方近日以性暴力對待示威者,Suki認為必須成立獨立調查委員會去調查事件,「如果佢哋真係無做過係唔需要驚囉」。當初得悉有女示威者被凌辱時,Suki直言感到心痛,「其實真係唔需要咁樣去凌辱啲細路女,如果你覺得佢做錯,你可以告佢,但唔係用暴力同埋性暴力囉」。
謝小姐指,警察以性侮辱的方式對待示威者,不論男性或女性都會遭到警方的性侮辱對待,「好似之前俾人拉咗嘅畫家,佢都有講過係受到性侮辱」,直斥警方的做法是濫權,「警隊其實係咪缺乏足夠嘅訓練?當然希望警隊可以檢討下,但佢哋係覺得自己無錯㗎嘛」,認為警方的情緒訓練不足,不太懂得控制自己的EQ。謝小姐指近來警方性侮辱手法是意圖恐嚇包括男性及女性在內的示威者,「但香港人唔係咁容易被嚇親」。
戴上豬頭面罩出席MeToo集會集會的陳先生指,自己戴上面罩是諷刺政府及建制派將港人「當豬仔咁賣,但親政府同親建制人士好似豬咁樣,唔當係一回事」。陳先生指除了性暴力,警方亦肆意濫用不同程度暴力對待示威者,即使性暴力亦已非單一事件,「點解警方濫暴要不斷針對女性?」認為香港現時是將自己由文明社會「好似打斷自己隻腳咁」,又指警方及政府現時是以白色恐怖意圖令港人就範,「但唯一阻到你行出嚟只有自己嘅心魔」。 |