窮富難解

TKT

蛇年伊始，有啲不祥之兆，第一係劉皇發求到第95車公下簽，同一日，又有天主教教宗本篤十六世宣佈退位，主動請辭，消息一出，數小時後梵蒂岡就刮起暴風雨，雷閃電擊，劈中聖伯多祿大教堂圓頂，跟住到咗年初三，北韓敢冒天下大不韙，悍然做地下核爆，勢必令日本、南韓、美國緊張萬分，東北亞局勢動盪不安。
左丁山睇美國、歐洲數據，加上日本無限QE，本來對2013年市道審慎樂觀，諗住可以入市，但俾上述三件事窒一窒，都係小注怡情好過咯，今年要走位靈活似金蛇先至得掂。
香港市民本來係十分樂觀嘅，睇吓年初三馬場入場人數有十一萬幾，投注總額過十五億，破歷年紀錄，簡直驚人，在馬場內人逼人，搭打晒蛇餅，外來遊客見到，邊個敢話香港窮呀？民建聯在新年做一個調查訪問八百名市民，「發現」三分一人嘅新年使費低於去年，民建聯於是呼籲財爺在預算案派糖以紓民困，適值財爺年初三在馬場代替去咗英國放假嘅梁特首頒獎，財爺在馬場見到咁多人，咁大嘅投注額，大概會得到一個與民建聯相反嘅印象：如此多人在馬場玩樂，派糖嚟做乜？另一方面，又有調查話訪問咗六百位四十歲以下市民講情人節，「發現」有人願花半個月糧嚟與拖友慶祝，非常豪氣啫，亦都表示市民唔怕冇工做，用咗半個月薪水過一日，一定可以搵得番；呢個調查似乎與民建聯調查對着幹，如果要曾俊華揀，唔知信得邊個好。大記者在年廿九（二月九日）到街市，見到一檔雞販賣咗四百隻雞，每隻二百幾蚊，雞販半日內嘅營業額係十萬元，賺到幾多，佢自己至知，故此大記者講：「香港藏富於民，啲政黨發表嘅貧窮數字，唔係幾信得過。嗰個雞販住在公屋，交唔交稅冇人知，佢賺錢肯定多過我！」記者係窮啲嘅，表妹個仔讀緊新聞系，拜年時佢話：「一啲同學畢業得八九千蚊人工，點解我地人工咁少嘅？」又真係少啲，迪士尼樂園嘅最低工資都超過一萬元，揸掃帚賺錢多過揸支筆，記者就真係窮，唔知係唔係因為咁樣，記者寫香港貧窮新聞特別落力，言為心聲也。

左丁山  

                               
登錄/註冊後可看大圖

電郵 :mcwriter@appledaily.com